QORAQALPOG‘ISTONNING SHIMOLIY TUMANLARIDA KUZGI BUG‘DOY HOSILDORLIGIGA BEGONA O‘TLARNING TUR TARKIBI VA FITOSANITAR HOLATINING TA’SIRI

Annotatsiya

Maqolada Shimoliy Qoraqalpog‘istonning o‘ziga xos tabiiyiqlim sharoitiga ega bo‘lgan Chimboy tumani misolida kuzgi bug‘doyzorlarning begona o‘tlar bilan ifloslanish holati tahlil qilingan. Hududning tuproq sho‘rlanish darajasi, samarali harorat yig‘indisi va namlik ko‘rsatkichlari Markaziy hamda Janubiy mintaqalardan farq qilishi begona o‘tlar populyatsiyasining shakllanishiga bevosita ta’sir ko‘rsatishi aniqlangan. Tadqiqotlar natijasida tuman g‘alla maydonlarida 15 oila va 47 turkumga mansub 52 turdagi begona o‘tlar qayd etildi. Bu ko‘rsatkich respublikaning janubiy mintaqalariga nisbatan turlar xilma-xilligi bo‘yicha 1–11 taga kamdir. Shuningdek, aniqlangan begona o‘tlarning biologik guruhlar bo‘yicha taqsimotida bir yillik o‘simliklar ustunlik qilib (59,6%), ko‘p yilliklar 34,6% va ikki yilliklar 5,8% ni tashkil etishi kuzatildi.